କୁଜଙ୍ଗ(ରଂଜିତ କୁମାର ପଣ୍ଡା): ଜିନ୍ଦଲ ପ୍ରକଳ୍ପ ତାର ଜନଶୁଣାଣିକୁ ଚଳିତ ମାସ ୨୨ ତାରିଖ ପରିବର୍ତେ ଡିସେମ୍ବର ୨୦କୁ ଘୁଂଚାଇ ଦିଆଯାଇଥିବା ବେଳେ ଏହି ପ୍ରକଳ୍ପ ନେଇ ଲୋକଙ୍କ ମନରେ ଦ୍ୱନ୍ଦ୍ୱ ଉପୁଜିବାରେ ଲାଗିଛି । ପୋସ୍କୋ ଜମି ଅଧିଗ୍ରହଣ ସମୟରେ ପୋସ୍କୋକୁ ସର୍ତଭିତିକ ସମର୍ଥନ ଦେଇଥିବା ମିଳିତ କ୍ରିୟାନୁଷ୍ଠାନ କମିଟି ଦୀର୍ଘ ଦିନଧରି ସୁପ୍ତ ଅବସ୍ଥାରେ ରହିଥିବାବେଳେ ଆଜି ଏହାକୁ ପୁନର୍ଗଠନ କରାଯାଇ କାର୍ଯ୍ୟକ୍ଷମ କରାଯିବାକୁ ଗଡ଼କୁଜଙ୍ଗ ଠାରେ ଅନୁଷ୍ଠିତ ବୈଠକରେ ନିଷ୍ପତି ଗୃହୀତ ହୋଇଥିବା ଜଣାପଡ଼ିଛି । ବୈଠକରେ ପୂର୍ବରୁ କାର୍ଯ୍ୟ କରିଥିବା ସମସ୍ତ ସଭ୍ୟମାନେ ଉପସ୍ଥିତ ରହି କମିଟି କାର୍ଯ୍ୟପନ୍ଥା ନିର୍ଦ୍ଧାରଣ କରିବା ସହିତ ପୋସ୍କୋ ଭଳି ଜିନ୍ଦଲ ପ୍ରକଳ୍ପକୁ ମଧ୍ୟ ସର୍ତ ଭିତିକ ସମର୍ଥନ ଜଣାଇବାକୁ ସହମତି ପ୍ରକାଶ କରାଯାଇଥିଲା ।
ପ୍ରକାଶଯେ, ଆଜି ମଧ୍ୟାହ୍ନରେ ସ୍ଥାନୀୟ ଗଡକୁଜଙ୍ଗ ମନ୍ଦିର ପରିସରରେ ପୂର୍ବତନ ସମିତି ସଭ୍ୟ ଜୀବନଲାଲ ବେହେରା ସଭାପତିତ୍ୱରେ ଏକ ସମାବେଶ ଅନୁଷ୍ଠିତହୋଇଥିଲା । ଏଥିରେ ତତକାଳୀନ କମିଟି ସମ୍ପାଦକ ନିର୍ଭୟ ସାମନ୍ତରାୟ, ତାମିଲ କୁମାର ପ୍ରଧାନ, ସମରେନ୍ଦ୍ର ନାୟକ ପ୍ରମୁଖ ନିଜ ନିଜର ବକ୍ତବ୍ୟ ପ୍ରଦାନକରି ଜିନ୍ଦଲ କମ୍ପାନୀ ପ୍ରଥମେ ଅଂଚଳରେ ବିକାଶ ମୂଳକ କାର୍ଯ୍ୟ କରିବା ସହିତ ପୂର୍ବରୁ ପାନବରଜ ହରାଇଥିବା ମାଲିକମାନଙ୍କୁ ଉପଯୁକ୍ତ କ୍ଷତିପୂରଣ, ପାନବରଜ ଶ୍ରମିକ ମାନଙ୍କୁ ଘୋଷଣା ଅନୁଯାୟୀ ଭତା ପ୍ରଦାନ କରିବାକୁ ଦାବୀ କରିଥିଲେ । ସେହିପରି ଭାବେ ସ୍ଥାନୀୟ ଯୁବକ ମାନଙ୍କୁ ନିଯୁକ୍ତି ପ୍ରଦାନ ନେଇ ନିଶ୍ଚିତ ପ୍ରତିଶୃତି, ପରିବେଶ ସନ୍ତୁଳନ ନେଇ ପ୍ରକି୍ରିୟା ଆରମ୍ଭ କରିବା ଆଦି କାର୍ଯ୍ୟ କରିବା ଉପରେ ଗୁରୁତ୍ୱାରୋପ କରିଥିଲେ । ତେବେ ଏହି ସମସ୍ତ କାର୍ଯ୍ୟ ଜରିଆରେ ପ୍ରଥମେ ଅଂଚଳ ବାସୀଙ୍କ ମନରେ ବିଶ୍ୱାସ ଜନ୍ମାଇବା ପରେ ଲୋକମାନେ ପ୍ରକଳ୍ପକୁ ସମର୍ଥନ କରିବାନେଇ ସେମାନଙ୍କର ଆଭିମୁଖ୍ୟ ସ୍ପଷ୍ଟ କରିବେ ବୋଲି ସେମାନେ ସ୍ପଷ୍ଟ କରିଥିଲେ । ଅନ୍ୟ ମାନଙ୍କ ମଧ୍ୟରେ ବେଳେ ଏହି ବୈଠକରେ ରାଜେନ୍ଦ୍ର ବେହେରା, ଶରତ ସ୍ୱାଇଁ, ନକୂଳାନନ୍ଦ ସାହୁ, ନୃସିଂହ ରାଉତ, ଢିଙ୍କିଆ ସମିତି ସଭ୍ୟ ଦେବେନ୍ଦ୍ର ସ୍ୱାଇଁ, ବାସୁଦେବ ଖଣ୍ଡୁଆଳ, ବିଷ୍ଣୁ ପ୍ରଧାନ, ତୀର୍ଥରାଜ ମନ୍ତ୍ରୀ ପ୍ରମୁଖ ଟାଣୁଆ ସଂଗଠକ ଓ ମୁରବୀ ମାନେ ସମ୍ମିଳିତ ହୋଇ ଆଲୋଚନାରେ ଅଂଶ ଗ୍ରହଣ କରିଥିଲେ । ପ୍ରାରମ୍ଭରେ ଜନଶୁଣାଣୀ ଆରମ୍ଭ ପୂର୍ବରୁ ଲୋକ ମାନେ ଅନ୍ଧାରରେ ରହିଛନ୍ତି । କମ୍ପାନୀ କର୍ତୃପକ୍ଷ ଲୋକଙ୍କୁ ଅନ୍ଧାରରେ ରଖି ଅଂଚକୁ ଘନଘନ ଗସ୍ତକରିବା ନେଇ ବୈଠକରେ କ୍ଷୋଭ ପ୍ରକାଶ ପାଇଥିଲା । ଶିଳ୍ପ ହେଉ କିନ୍ତୁ ଲୋକଙ୍କ ସମସ୍ୟା ଆଗ ଦୂର କରାଯାଉ ବୋଲି ସର୍ତଭିତିକ ଭାବେ ପୋସ୍କୋ ସମୟରେ ଶିଳ୍ପକୁ ସମର୍ଥନ ଦେଇ ଆସିଥିବା ଏହି ନେତାମାନେ କହିବା ସହ ପୂର୍ବ ସମୟରୁ କରାଯାଇଥିବା ୨୯ ଦଫା ଦାବି ବିଷୟରେ ଆଲୋଚନା କରିଥିଲେ । ଆସନ୍ତା ମଙ୍ଗଳବାର ପୁଣି ଏକ ବୈଠକ ହେବା ସହିତ ପ୍ରତି ଗ୍ରାମରେ କମିଟି ବୁଲି ଲୋକଙ୍କୁ ସଚେତନ କରିବ ବୋଲି ନିଷ୍ପତି ହୋଇଛି । ଏହି କମ୍ପାନୀରେ ହେଲେ ତାପମାତ୍ରା ବୃଦ୍ଧି ସହ ପରିବେଶ ସମସ୍ୟାନେଇ ଜନୈକ ସମିତିସଭ୍ୟ ଦୃଢ ଯୁକ୍ତି ଉପସ୍ଥାପନ କରିଥିଲେ । ଅନ୍ୟପକ୍ଷରେ ଆଜି ଅପରାହ୍ନରେ ମଧ୍ୟ ନୁଆଗାଁ ସିଦ୍ଧଗୁମ୍ଫା ଆଶ୍ରମରେ ଦୁଇଟି ଗ୍ରୁପ୍ର ମୁରବୀମାନେ ଦୁଇଘଂଟା ଧରି ଜିନ୍ଦଲର ବରିଷ୍ଠ ଅଧିକାରୀମାନଙ୍କ ସହ ଆଲୋଚନା କରିଛନ୍ତି ।