ଭୁବନେଶ୍ୱର : ୨୦୨୪ ନିର୍ବାଚନ ପାଖେଇ ଆସୁଛି । ଫଳରେ ରାଜ୍ୟ ରାଜନୀତି ଚଳଚଞ୍ଚଳ ହୋଇ ଉଠିଛି । ୫-ଟି ସଚିବ ଖୋଦ୍ ରାଜ୍ୟ ସାରା ରାଜ୍ୟ ଗସ୍ତ କରି ନିର୍ବାଚନ ମଣ୍ଡଳୀର ସ୍ଥିତି ପରଖୁଛନ୍ତି । ୨୦୨୪ରେ କିଛି ପୁରୁଣା ଚେହେରାଙ୍କୁ ବାଦ ଦିଆଯିବ ବୋଲି ଚର୍ଚ୍ଚା ହେଉଛି । ଯୁବକମାନଙ୍କୁ ଆସନ୍ତା ୨୦୨୪ ନିର୍ବାଚନରେ ଗୁରୁତ୍ୱ ଦିଆଯିବ ବୋଲି ବିଜେଡି ଭିତିରି ମହଲ ସୂତ୍ରରୁ ଜଣାପଡ଼ିଛି । ଫଳରେ ଯୁବନେତାମାନେ ବିଶେଷ ଆଶାବାଦୀ ହୋଇ ଉଠିଛନ୍ତି । ନିର୍ବାଚନ ମଣ୍ଡଳୀ ଗସ୍ତ କରି ନିଜର ସଂଗଠନ ସୃଷ୍ଟି କରିବାରେ ଯୁବନେତାମାନେ ସକ୍ରିୟ ହୋଇ ଉଠିଛନ୍ତି ।
ରାଜ୍ୟର ଏକ ପ୍ରମୁଖ ନିର୍ବାଚନ ମଣ୍ଡଳୀ ଆଠଗଡ଼ର ସ୍ଥିତିକୁ ତର୍ଜମା କଲେ ଜଣାଯାଏ ଯେ ଚଳିତ ଥର ଏହି ନିର୍ବାଚନ ମଣ୍ଡଳୀର ପୁରୁଖା ନେତା ତଥା ରାଜ୍ୟ କ୍ୟାବିନେଟ୍ର କୃଷିମନ୍ତ୍ରୀ ରଣେନ୍ଦ୍ରପ୍ରତାପ(ରାଜା) ସ୍ୱାଇଁଙ୍କ ଆସନ ଅସୁରକ୍ଷିତ ହୋଇପଡ଼ିଛି । କାରଣ ଗତ କିଛିଦିନ ତଳେ ୫-ଟି ସଚିବ ଭି କେ ପାଣ୍ଡିଆନ୍ ଧବଳେଶ୍ୱର ପୀଠକୁ ସଂଯୋଗ କରୁଥିବା ପୋଲ ଉଦ୍ଘାଟନ କରିବାକୁ ଗଲାବେଳେ ସେହି ସମୟରେ ପାଖ ପଞ୍ଚାୟତରେ ଉପସ୍ଥିତ ଥିବା ମନ୍ତ୍ରୀ ଶ୍ରୀ ସ୍ୱାଇଁଙ୍କୁ କାର୍ଯ୍ୟକ୍ରମରେ ଯୋଗ ଦେବାକୁ ଡାକି ନଥିଲେ । ସେହି ସମୟଠାରୁ ଆଠଗଡ଼ ନିର୍ବାଚନ ମଣ୍ଡଳୀରେ ଚର୍ଚ୍ଚା ଚାଲିଛି ଯେ ବିଜେଡି ତୃତୀୟ ମହଲା ସୁନଜରରେ ରାଜା ଆଉ ନାହାନ୍ତି ।
ରାଜାଙ୍କ ବଦଳରେ ବିଜେଡି କୋର୍ କମିଟି ନୂଆ ମୁହଁ ଖୋଜୁଥିଲା ବେଳେ ଆଠଗଡ଼ର ଯୁବନେତା ମାନସ ବସ୍ତିଆଙ୍କ ନାମ ବର୍ତ୍ତମାନ ଜୋରସୋର୍ରେ ଚର୍ଚ୍ଚା ହେଉଛି । ଆଠଗଡ଼ ବିକାଶ ମଞ୍ଚ ପ୍ରତିଷ୍ଠା କରି ଆଠଗଡ଼ ଓ ତିଗିରିଆ ଅଞ୍ଚଳରେ ନିଜର ସାଂଗଠିନକ ଓ ସାମାଜିକ କାର୍ଯ୍ୟକ୍ରମରେ ଶ୍ରୀ ବସ୍ତଆ ନିଜକୁ ନିୟୋଜିତ କରିଛନ୍ତି । କରୋନା ସମୟରେ ସେ ଆଠଗଡ଼ ନିର୍ବାଚନ ମଣ୍ଡଳୀର ଅସୁସ୍ଥ ବ୍ୟକ୍ତିମାନଙ୍କୁ ନିଜ ଉଦ୍ୟମରେ ଅମ୍ଲଜାନ ମେସିନ୍ ଯୋଗାଇ ଦେଇ ବେଶ୍ ଚର୍ଚ୍ଚାକୁ ଆସିଥିଲେ । ଏଥିସହିତ ଗରିବ, ଅସହାୟ ବ୍ୟକ୍ତିମାନଙ୍କୁ ବିଭିନ୍ନ ସହାୟତା ସାମଗ୍ରୀ ଯୋଗାଇବା ସହ ବିଭିନ୍ନ ସ୍କୁଲର ଛାତ୍ରଛାତ୍ରୀଙ୍କୁ ପୁସ୍ତକ ବଣ୍ଟନ ଭଳି ସମାଜସେବାରେ ନିୟୋଜିତ ଅଛନ୍ତି । ନିର୍ବାଚନ ମଣ୍ଡଳୀର ପ୍ରାୟ ପ୍ରତ୍ୟେକ ପଞ୍ଚାୟତରେ ସେ ସାମାଜିକ କାର୍ଯ୍ୟକ୍ରମ ମାଧ୍ୟମରେ ଲୋକମାନଙ୍କର ବେଶ୍ ନିକଟତର ହୋଇପାରିଛନ୍ତି । ବର୍ତ୍ତମାନ ରାଜ୍ୟର ଅନେକ ଇଲୋକ୍ଟ୍ରୋନିକ୍ସ ମିଡିଆର ବିତର୍କରେ ଅଂଶଗ୍ରହଣ କରି ସେ ବିଜେଡି ପାଇଁ ଦୃଢ଼ ମତ ରଖୁଛନ୍ତି । ତେଣୁ ରାଜା ସ୍ୱାଇଁଙ୍କ ବଦଳରେ ଚଳିତ ଥର ମାନସ ବସ୍ତିଆଙ୍କୁ ଆଠଗଡ଼ ନିର୍ବାଚନ ମଣ୍ଡଳୀରୁ ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି ।
ତେବେ ଏ ସମ୍ପର୍କରେ ଶ୍ରୀ ବସ୍ତିଆଙ୍କ ସହିତ ଯୋଗାଯୋଗ କରିବା ପରେ ଶାନ୍ତିସେନା ନ୍ୟୁଜକୁ ଶ୍ରୀ ବସ୍ତିଆ କହିଛନ୍ତି ଯେ ସେ ୧୯୯୭ ମସିହାରୁ ବିଜୁ ଜନତା ଦଳର ପ୍ରତିଷ୍ଠା ସମୟରୁ ବିଜେଡି ସହିତ ଅଛନ୍ତି । ରାଜା ସ୍ୱାଇଁ ନିଜ ସ୍ୱାର୍ଥ ପାଇଁ ପଛରେ ଆସି ବିଜେଡିରେ ମିଶିଛନ୍ତି । ଆଠଗଡ଼ ନିର୍ବାଚନ ମଣ୍ଡଳୀରେ ବିଜେଡି କର୍ମୀମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି । ନିଜର ପୁତୁରା ଓ ଭଣଜାଙ୍କ ମାଧ୍ୟମରେ ମନ୍ତ୍ରୀ ଶ୍ରୀ ସ୍ୱାଇଁ ସମସ୍ତ କାର୍ଯ୍ୟ କରୁଥିଲା ବେଳେ ବିଜେଡି କର୍ମୀମାନେ ଅବହେଳିତ ହୋଇ ରହିଛନ୍ତି । ଅନେକ ସରପଞ୍ଚ ଓ ସଭ୍ୟ ତାଙ୍କ ସହିତ ଯୋଗାଯୋଗରେ ଅଛନ୍ତି ବୋଲି ଶ୍ରୀ ବସ୍ତିଆ କହିଛନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକ ତାଙ୍କର ଆଦର୍ଶ ତଥା ସର୍ବମାନ୍ୟ ନେତା । ସେ ଯାହା ଆଦେଶ ଦେବେ, ସେହି ଅନୁସାରେ ସେ କାର୍ଯ୍ୟ କରିବେ । ଆଠଗଡ଼ରେ ରାଜାଙ୍କ ନାମରେ ଭୋଟ ନାହିଁ, ନବୀନ ପଟ୍ଟନାୟକଙ୍କ ନାମରେ ଭୋଟ ରହିଛି । ନବୀନ ପଟ୍ଟନାୟକ ଯାହାକୁ ଟିକେଟ୍ ଦେବେ ସେ ଆଠଗଡ଼ରୁ ଜିତିବେ ବୋଲି ଶ୍ରୀ ବସ୍ତିଆ କହିଛନ୍ତି ।