ଭୁବନେଶ୍ୱର: ୩ ଗୋଡ଼ ଥିବା ଶିଶୁକୁ ଚିକିତ୍ସା ପାଇଁ ଏମ୍ସରେ ଭର୍ତ୍ତି କରାଯାଇଛି । ବାଲେଶ୍ୱର ଜିଲ୍ଲାର ଔପଦା ବ୍ଲକର ବଡ଼ପୋଖରୀ ଗାଆଁର ଶିଶୁ ସୁଦାମ ଚରଣ ବେହେରାଙ୍କର ଜନ୍ମରୁ ୩ଟି ଗୋଡ଼ ଥିଲା । ଯାହାକୁ ନେଇ ସେ ଦୈନନ୍ଦିନ ଜୀବନରେ ଚଳପ୍ରଚଳ ପାଇଁ ବେଶ୍ ଅସୁବିଧାର ସମ୍ମୁଖୀନ ହେଉଥିଲେ । ସୁଦାମର ଉଚ୍ଚତର ଚିକିତ୍ସା ସମ୍ପର୍କରେ ବାଲେଶ୍ୱରର ସ୍ୱେଚ୍ଛାସେବୀ ସଂଗଠନ ମାନବ ଉତ୍ଥାନ ସେବା ସଂସ୍ଥାନ ତରଫରୁ କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀଙ୍କୁ ସାହାଯ୍ୟ ପାଇଁ ଅନୁରୋଧ କରାଯାଇଥିଲା । କେନ୍ଦ୍ରମନ୍ତ୍ରୀ ଶ୍ରୀ ଷଡ଼ଙ୍ଗୀ ସୁଦାମର ଉତ୍ତମ ଚିକିତ୍ସା ପାଇଁ ଭୁବନେଶ୍ୱର ଏମ୍ସ କର୍ତ୍ତୃପକ୍ଷଙ୍କୁ ଚିଠି ଲେଖିଥିଲେ । କେନ୍ଦ୍ରମନ୍ତ୍ରୀଙ୍କ ଚିଠି ଫଳରେ ଗୁରୁବାର ସୁଦାମଙ୍କୁ ଭୁବନେଶ୍ୱର ଏମ୍ସରେ ଭର୍ତ୍ତି କରାଯାଇଛି । ଶିଶୁଟିର ଉଚ୍ଚତର ଚିକିତ୍ସା ସହାୟତାରେ ମାନବ ଉତଥାନ ସେବା ସଂସ୍ଥାନର ସଭାପତି ଜୟନ୍ତ କୁମାର ପ୍ରଧନ, ସନତ କୁମାର ପାତ୍ର, ବ୍ରହ୍ମାନନ୍ଦ ସ୍ୱାଇଁ, ସୁଧାକର ସେଠୀ, ମଧୁସୂଦନ ବେହେରା ଓ ସାମ୍ବାଦିକ ରାମଜୀବନ ଗୋଚ୍ଛାୟତଙ୍କର ପ୍ରମୁଖ ଭୂମିକା ରହିଛି । ସୁଦାମର ବାପା ଶୁକୁରି ବେହେରା ଓ ମାଆ କୁମୁଦିନୀ ବେହେରା ଏମ୍ସରେ ପୁଅ ପାଖରେ ରହି ଦେଖାଶୁଣା କରୁଛନ୍ତି । ତେବେ ଜଗାବଳିଆଙ୍କୁ ଯେପରି ରାଜ୍ୟ ସରକାର ମାଗଣା ଚିକିତ୍ସା ଯୋଗାଇଦେଲେ, ସେହିପରି ସୁଦାମକୁ ଚିକିତ୍ସା ସହାୟତା ଯୋଗାଇ ଦିଆଯାଉ ବୋଲି ଦାବି ହେଉଛି ।
