ଭୁବନେଶ୍ୱର : କବି ନିତ୍ୟାନନ୍ଦ ନାୟକ ଚଳିତ ବର୍ଷର ସମ୍ମାନଜନକ ଶାରଳା ପୁରସ୍କାର ପାଇବେ l ନିଜର କବିତା ସଂକଳନ ‘ସେତେବେଳେକୁ ନଥିବି ‘ପାଇଁ ସେ ଏହି ପୁରସ୍କାର ପାଇବେ l ପୂର୍ବରୁ ସେ କବିତା ପାଇଁ ପ୍ରଜାତନ୍ତ୍ର ବିଷୁବ ପୁରସ୍କାର ମଧ୍ୟ ଲାଭ କରିଛନ୍ତି l ଜଗତସିଂହପୁର ସ୍ୱାମୀ ବିବେକାନନ୍ଦ କଲେଜରୁ ଅଧ୍ୟାପନା ବୃତ୍ତିରୁ ଅବସର ଗ୍ରହଣ କରି ସେ କଟକ ଖପୁରିଆସ୍ଥିତ ନିଜ ବାସଭବନରେ ରହୁଛନ୍ତି l ତାଙ୍କର କବିତାରେ ମଣିଷର ନିଃସଙ୍ଗତା ମୁଖ୍ୟ ସ୍ୱର l ପ୍ରତୀକ, ରୂପକଳ୍ପଗୁଡିକ ମଧ୍ୟ ବେଶ ଚମତ୍କାର l ପ୍ରଚାର, ପ୍ରସାରରୁ ବିମୁଖ ଶ୍ରୀ ନାୟକ ଜଣେ ନିରବ ସାଧକ ଭଳି ଦୀର୍ଘ ବର୍ଷ ଧରି ସାହିତ୍ୟ ସାଧନାରେ ନିମଗ୍ନ l
