🔸 ଡିଜିଟାଲ ମିଡ଼ିଆରେ ସାହିତ୍ୟ 🔸

ଶ୍ରୁତକୀର୍ତ୍ତି ତ୍ରିପାଠୀ

ସମାଜର ବାସ୍ତବତାକୁ ଲୋକଙ୍କ ସମ୍ମୁଖକୁ ଆଣେ ସାହିତ୍ୟ l ମଣିଷ ମନରେ ଜାତ ହେଉଥିବା ସ୍ବପ୍ନ, ସମ୍ଭାବନା, ଆଶା କୁ ଅଧିକ ଜାଗ୍ରତ କରିବା ପାଇଁ ସାହିତ୍ୟର ସୃଷ୍ଟି l ସମାଜର ହିତ ସାଧନ କରେ ବୋଲି ସେ ସାହିତ୍ୟ, ଏଣୁ ଏକ ସୁସ୍ଥ ସମାଜ ଗଠନ ଦିଗରେ ସାହିତ୍ୟର ଭୂମିକା ସବୁବେଳେ ଆଗରେ l ଆମ ଓଡ଼ିଆ ସାହିତ୍ୟରେ ବହୁ କାଳଜୟୀ ସ୍ରଷ୍ଟାଙ୍କ ସ୍ଵାକ୍ଷର ଲିପିବଦ୍ଧ l ଆବଶ୍ୟକତା ଅଛି ତାକୁ ପଠନ କରି ତନ୍ମଧ୍ୟରେ ଥିବା ଚିନ୍ତନ ଓ ସାରମର୍ମରୁ କିଛି ଆହରଣ କରିବା l ମାତ୍ର ବିଡମ୍ବନା ଏହା ଯେ ଓଡ଼ିଆ ସାହିତ୍ୟର ବିଶାଳ ଗନ୍ତାଘର ସବୁ ପାଠକଙ୍କ ପାଖକୁ ପହଞ୍ଚି ପାରୁନାହିଁ l କିମ୍ବା ଏଭଳି ବି କୁହାଯାଇପାରେ ଯେ ସେହି ପୁସ୍ତକ ସମାହାରକୁ ପଢିବା ପାଇଁ ଅନେକଙ୍କ ପାଖରେ ସମୟରେ ଘୋର ଅଭାବ l ଏହି ଅଭାବକୁ ଦୂର କରିବାକୁ ଯାଇ ଏବେ ସାହିତ୍ୟକୁ ଡିଜିଟାଲ ବା ଯାନ୍ତ୍ରିକ ମାଧ୍ୟମରେ ପ୍ରଚାର ଏବଂ ପ୍ରସାର କରିବା ଆରମ୍ଭ ହୋଇଛି l ଏହା ପଛରେ ଉଦ୍ଦେଶ୍ୟ ଏହା ଯେ ମଧ୍ୟାମ ଯାହା ହେଉ ନା କାହିଁକି ଅଧିକରୁ ଅଧିକ ଲୋକ ପଠନ, ଲିଖନ, ଦର୍ଶନ ଏବଂ ଚିନ୍ତନ ମାଧ୍ୟମରେ ସାହିତ୍ୟକୁ ସମୃଦ୍ଧ କରନ୍ତୁ l

ଯୁଗ ଥିଲା ପୁସ୍ତକ ପଠନରେ ଲୋକ ପରମ ଆନନ୍ଦ ପାଉଥିଲେ l ଖାଲି ସମୟରେ ଅବସର ବିନୋଦନ ଏବଂ ମନୋରଞ୍ଜନ ର ଏକ ମାଧ୍ୟମ ଥିଲା ବିଭିନ୍ନ ପ୍ରକାରର ପୁସ୍ତକ ପଠନ l କ୍ରମେ ଏହାର ସ୍ଥାନ ଟେଲିଭିଜନ, ରେଡ଼ିଓ, କମ୍ପୁଟର ଓ ମୋବାଇଲ ନେଲେ l ଧୀରେ ଧୀରେ ଲୋକଙ୍କର ବହି ପଢ଼ିବାର ଅଭ୍ୟାସ କମି କମି ଗଲା l ପୁସ୍ତକର ଆକର୍ଷଣ ପାଠକ ଆଉ ଅନୁଭବ କଲେ ନାହିଁ l ଯାହା ସାହିତ୍ୟର ଉନ୍ନତି ଏବଂ ସମୃଦ୍ଧି ପଥକୁ ଅବରୋଧ କରିଲା l ତଥାପି କିଛି ପ୍ରକାଶକ,ସ୍ରଷ୍ଟା ଏବଂ ପାଠକଙ୍କ ପ୍ରୟାସ ଯୋଗୁଁ ଆଜି ମଧ୍ୟ ବହି ଛପା, କିଣା ଓ ବିକା ଚାଲିଛି l ହେଲେ ପ୍ରକାଶିତ ପୁସ୍ତକ ପଢିବାକୁ ପାଠକ ମନରେ ଆଗ୍ରହ ପ୍ରକାଶକ ବା ସ୍ରଷ୍ଟା ସୃଷ୍ଟି କରିପାରିବେ ନାହିଁ l

ବର୍ତ୍ତମାନ ଦେଖାଯାଉଛି ଯେ ଡିଜିଟାଲ ମିଡ଼ିଆ, ଯେପରିକି ଫେସବୁକ, ୱେବ ପୋର୍ଟାଲ ରେ ଅନେକ ସାହିତ୍ୟିକ ନିଜ ଲେଖା ଦେବାକୁ ଇଛୁକ ହେଲେଣି l ନିଜର ସୃଜନକୁ ବିନା କାହାର ସାହାଯ୍ୟରେ ପ୍ରକାଶ କରିବାର ୟା ଠାରୁ ସହଜ ମାଧ୍ୟମ ଆଉ କଣ ହୋଇପାରେ ? ବିନା ଟଙ୍କା ଖର୍ଚ୍ଚ କରି, ଖୁବ ଅଳ୍ପ ସମୟ ଭିତରେ ନିଜ ଲେଖାଗୁଡିକୁ ଅନେକ ପାଠକଙ୍କ ପାଖକୁ ପହଞ୍ଚେଇବା ଦିଗରେ ଡିଜିଟାଲ ମାଧ୍ୟମର କାର୍ଯ୍ୟ ପ୍ରଶଂସନୀୟ l ପୁଣି ହ୍ଵାଟ୍ସଆପ ଏବଂ ଇନଷ୍ଟାଗ୍ରାମ ଭଳି ମାଧ୍ୟମରେ ଏହାର ବହୁଳ ପ୍ରଚାର ଖୁବ କମ ସମୟ ଭିତରେ ଜଣେ ଲେଖକ / ଲେଖିକା ଙ୍କୁ ନିଜର ପରିଚୟ ସୃଷ୍ଟି କରିବାରେ ସହାୟକ ହେଉଛି l ପୁନଃ ସେହି ଲେଖାଗୁଡିକୁ ୟୁ ଟ୍ୟୁବ ଅଡିଓ ଓ ଭିଡିଓ ଯୋଗେ ଆହୁରି ଆକର୍ଷଣୀୟ ଏବଂ ମନଲୋଭା କରି ସମସ୍ତଙ୍କ ଆଗରେ ପରଷି ଦିଆଯାଉଛି l

ପୁସ୍ତକ ଗୁଡିକୁ ଏକାଠି ରଖିବା ପାଇଁ ଅଧିକ ସ୍ଥାନ ଦରକାର ଏବଂ ଏହାର ସଂରକ୍ଷଣ ମଧ୍ୟ ଜରୁରୀ l ଏଭଳି ସ୍ଥଳରେ ଲେଖା ଗୁଡିକୁ ଡିଜିଟାଲାଇଯେସନ କରି ରଖିବା ଏବଂ ସହଜରେ ଦେଖିବା ଅଧିକ ସୁବିଧାଜନକ l ଏହା ଦ୍ୱାରା ଯାତ୍ରା କରିବା ସମୟରେ, କୌଣସି କାମ କରିବା ସମୟରେ କିମ୍ବା ଅବସର ସମୟରେ ଏହାକୁ ଶୁଣି କିମ୍ବା ଦେଖିବା ସମ୍ଭବ ହୁଏ l ପଠନକ୍ରିୟା ପାଇଁ ଏକାଗ୍ରତା, ଧୈର୍ଯ୍ୟ ଏବଂ ଶାନ୍ତ ପରିବେଶ ଦରକାର ହେଉଥିବା ବେଳେ ଦେଖିବା ଓ ଶୁଣିବା ପାଇଁ ଏତେ ସତର୍କତାର ଆବଶ୍ୟକତା ନ ଥାଏ l ଅପରପକ୍ଷେ ଏହା ଦର୍ଶକକୁ ବାନ୍ଧି ରଖିବା ସହିତ ଆହୁରି ଅଧିକ ସମୟ ବିନିଯୋଗ କରିବା ପାଇଁ ଆକର୍ଷିତ କରେ l ସୁତରାଂ ଏହି ମାଧ୍ୟମଟି ଖାଲି ଯେ ସାହିତ୍ୟିକଙ୍କୁ ସୁହାଉଛି ତା ନୁହେଁ ବରଂ ସାଧାରଣ ବର୍ଗର ଲୋକଙ୍କୁ ମଧ୍ୟ ସାହିତ୍ୟ ପ୍ରତି ଆଗ୍ରହୀ କରୁଛି l ଲାପଟପ, କମ୍ପୁଟର ଓ ମୋବାଇଲ ର ଗୋଟିଏ କ୍ଲିକ କିମ୍ବା ଟଚ୍ ରେ ଅନେକ ଲେଖା ବିଷୟରେ ଜାଣିବାର ସୁଯୋଗ ମିଳିବା ସାହିତ୍ୟପ୍ରେମୀଙ୍କ ପାଇଁ ନିଶ୍ଚୟ ଏକ ଶୁଭ ସୂଚନା l

ଡିଜିଟାଲାଇଜେସନ ଦ୍ୱାରା କେବଳ ଯେ ସୁବିଧା ହୁଏ ତା’ ନୁହେଁ, ଏହା ଅନେକ ଅସୁବିଧାକୁ ମଧ୍ୟ ନିମନ୍ତ୍ରଣ ଦିଏ l ଯେପରିକି ସମ୍ପାଦନା ଏବଂ ପ୍ରକାଶକଙ୍କ ଅନୁପସ୍ଥିତି ଯୋଗୁଁ ଅନେକ ନିମ୍ନମାନର କିମ୍ବା ଦ୍ବିଅର୍ଥବୋଧକ ସାହିତ୍ୟ ସୃଷ୍ଟି ହୋଇଥାଏ l କିନ୍ତୁ ଏତିକି ମନେ ରଖିବାକୁ ହେବ ଯେ ଯାହା ଉତ୍ତମ ନୁହେଁ ତାହା କ୍ଷଣସ୍ଥାୟୀ l ସମୟ ସହିତ ତାଳ ଦେଇ କେବଳ ଉନ୍ନତ, ସମୃଦ୍ଧ ଏବଂ ମହତ ବାର୍ତ୍ତା ଦେଉଥିବା ସୃଜନ ହିଁ ତିଷ୍ଠି ପାରିବ l ଏଣୁ ଏହାର ନକାରାତ୍ମକ ଦିଗକୁ ଅଧିକ ଧ୍ୟାନ ନ ଦେଇ ଏହାର ସକାରାତ୍ମକ ଦିଗ ଉପରେ ଉଭୟ ପାଠକ ଏବଂ ଲେଖକ ବେଶୀ ଗୁରୁତ୍ୱଦେବା ଆବଶ୍ୟକ ମନେହୁଏ l ବିଜ୍ଞାନ ଓ ପ୍ରଯୁକ୍ତିବିଦ୍ୟାର ପ୍ରଭାବ ଯେ ଆମ ଓଡ଼ିଆ ସାହିତ୍ୟ ଉପରେ ରହିଛି ଏବଂ ସେ ବି ଏକ ସୁସ୍ଥ ରୂପରେ ତାହା ଆମକୁ ମାନିନେବାକୁ ହେବ l

ସୋସିଆଲ ମିଡ଼ିଆ ରେ ଲେଖା ଆରମ୍ଭ କରୁଥିବା ଅନେକ ନୂଆ ପ୍ରତିଭା ଏବେ ଡିଜିଟାଲାଇଜେସନ ଉପରେ ଅଧିକ ଗୁରୁତ୍ୱ ଦେଉଛନ୍ତି l ବହି ଟିଏ କିଣି ପଢିବା ସମସ୍ତଙ୍କ ପାଇଁ ସମ୍ଭବ ହେଉ ନ ଥିବା ବେଳେ, ମୋବାଇଲ ପରଦାରେ ଲେଖା ପଢିବା, ଦେଖିବା ଓ ଶୁଣିବା ନିତି କିଛି ନୂଆ ପାଠକ ଏବଂ ଆଗକୁ ଯାଇ ନୂଆ ଲେଖକ କିମ୍ବା ସାହିତ୍ୟିକ ସୃଷ୍ଟି କରିବାରେ ସହାୟକ ହୋଇଛି l ବହୁ ପ୍ରାଚୀନ, ଉତ୍କୃଷ୍ଟ ଏବଂ କାଳଜୟୀ ସ୍ରଷ୍ଟା ଙ୍କ ସୃଜନ ସମୂହ ହାତପାଆନ୍ତାରେ ମିଳିପାରୁଛି, ଯାହା ସାହିତ୍ୟର ସମୃଦ୍ଧି ପଥରେ ଆଉ ଏକ ଫର୍ଦ୍ଦ ଯୋଡ଼ିଛି l

ଶେଷରେ ଏତିକି ସାରକଥା ଯେ, ମାଧ୍ୟମ ଯାହା ହେଉ ନା କାହିଁକି ଆମ ସାହିତ୍ୟ ଅଧିକରୁ ଅଧିକ ଲୋକଙ୍କୁ ଅନୁପ୍ରାଣିତ କରୁ l ଆମ କଳା, ସଂସ୍କୃତି, ପରମ୍ପରା, ଚଳଣିକୁ ବିଶ୍ୱ ଦରବାରରେ ପରିଚିତ କରେଇବା ଦିଗରେ ସାହିତ୍ୟର ଏହି ଯାନ୍ତ୍ରିକ ମାଧ୍ୟମ ବେଶ ସଫଳ ହୋଇଛି, ତାହା ସମସ୍ତେ ମାନିବେ l ଆବଶ୍ୟକତା ଅଛି ଉଭୟ ପାଠକ ଏବଂ ଲେଖକ ନିଜେ ଟିକେ ଯତ୍ନଶୀଳ ହେବେ l ଅଶ୍ଳୀଳ, ଦ୍ବିଅର୍ଥବୋଧକ ଏବଂ ନକାରାତ୍ମକ ସୃଜନ ଗୁଡିକୁ ଅଣଦେଖା କରି ସମାଜର ହିତ ସାଧନ କରୁଥିବା ସୃଜନକୁ ଆପଣେଇ ନେବେ l ସାହିତ୍ୟର ପ୍ରଚାର ଓ ପ୍ରସାର କ୍ଷେତ୍ରରେ ଡିଜିଟାଲ ମିଡ଼ିଆ ଯେ ଏକ ନୂତନ ବିପ୍ଳବ ଆଣିଛି, କହିଲେ ଅତ୍ୟୁକ୍ତି ହେବ ନାହିଁ l ଆଶା ଏହି ବିପ୍ଳବ ସବୁବର୍ଗର ଲୋକଙ୍କୁ ସାହିତ୍ୟ ପ୍ରତି ଆସକ୍ତ କରୁ l ମୋର ବିଶ୍ୱାସ ଭବିଷ୍ୟତରେ ଏହା ସାହିତ୍ୟକୁ ଆହୁରି ରୁଦ୍ଧିମନ୍ତ କରିବାରେ ସକ୍ଷମ ହେବ l

🔸 ଶ୍ରୁତକୀର୍ତ୍ତି ତ୍ରିପାଠୀ 🔸
ଫୋନ – 6370516478
ଭୁବନେଶ୍ୱର