ପାରାଦୀପ (ଦୀପ୍ତି ରଞ୍ଜନ ଦାସ ): ପୃଥିବୀର କୋଣଅନୁକୋଣରେ ଭଗବାନ ଶ୍ରୀ ସତ୍ୟସାଇ ବାବାଙ୍କର ୯୪ତମ ଜନ୍ମୋତ୍ସବ ନଭେମ୍ବର ୨୩ରେ ସତ୍ୟସାଇ ଆଶ୍ରିତ ମାନଙ୍କ ଦ୍ୱାରା ପାଳିତ ହୋଇଯାଇଛି । ଏହିଦିନ ଶ୍ରୀ ସତ୍ୟସାଇ ବାବା ଆନ୍ଧ୍ରପ୍ରଦେଶର ପୁଟ୍ଟପର୍ତ୍ତୀ ଗ୍ରାମରେ ଜନ୍ମଗ୍ରହଣ କରି ତାଙ୍କର ସଦୁପଦେଶ ସମଗ୍ର ବିଶ୍ୱର ମାନବ ସମାଜର କଲ୍ୟାଣ ନିମନ୍ତେ ପ୍ରଚାର କରିଥିଲେ।
ପାରାଦୀପ ଶ୍ରୀ ସତ୍ୟସାଇ ସେବା ସମିତି ଆନୁକୂଲ୍ୟରେ ଏହି ଉପଲକ୍ଷେ, ପ୍ରାତଃ ଓ ସକାଳ ସମୟରେ ଓଁକାରମ, ସୁପ୍ରଭାତମ, ନଗର ସଂକୀର୍ତ୍ତନ, ଷୋଡଶୋପଚାର ପୂଜା, ପ୍ରଶାନ୍ତି ପତାକା ଉତ୍ତୋଳନ, ଯଜ୍ଞ, ଭଜନ, ୧୨ ଘଣ୍ଟା ସାଇ ଗାୟତ୍ରୀ ଜପ, ନାରାୟଣ ସେବା, ପ୍ରସାଦ ସେବନ, ଚିକିତ୍ସାଳୟରେ ରୋଗୀଙ୍କୁ ଫଳ ବଣ୍ଟନ ଇତ୍ୟାଦି କାର୍ଯ୍ୟକ୍ରମ କରାଯାଇଥିଲା । ସନ୍ଧ୍ୟାରେ ବେଦ ଆବୃତ୍ତି, ଭଜନ, ସାମୁହିକ ଗାନ, ଝୁଲା, କେକ କାଟିବା କାର୍ଯ୍ୟକ୍ରମ ସହିତ ମଙ୍ଗଳ ଆରତୀ ପୂର୍ବକ ଉତ୍ସବର ପରିସମାପ୍ତି କରା ଯାଇଥିଲା । ସମିତିର ଆବାହକ, କର୍ମକର୍ତ୍ତା ଏବଂ ସମସ୍ତ ଭାଇ ଭଉଣୀ ମାନେ ସମଗ୍ର କାର୍ଯ୍ୟକ୍ରମ ଗୁଡିକୁ ଶୃଙ୍ଖଳିତ ଭାବେ ପରିଚାଳନା କରିଥିଲେ । ଏହି କାର୍ଯ୍ୟକ୍ରମରେ ପାରାଦୀପ ତଥା ଆଖ ପାଖ ଅଞ୍ଚଳର ଅନେକ ସାଇ ଆଶ୍ରିତ ଭାଇ ଓ ଭଉଣୀ ମାନେ ଯୋଗ ଦେଇଥିଲେ ।